Расія выкарыстала пры абстрэле Харкава балістычную ракету з КНДР — ААН
Харкаў пасля абстрэлу 2 студзеня 2024 года / @dsns_telegram
Як мінімум адна ракета, якой быў абстраляны ўкраінскі Харкаў 2 студзеня, была зробленая ў КНДР. Гаворка ідзе пра балістычную ракету серыі "Хвасон-11". Яе абломкі знайшлі ў Харкаве, піша агенцтва Reuters са спасылкай на даклад назіральнікаў ААН за санкцыямі. Даклад быў прадстаўлены Савету Бяспекі.
Прадстаўнікі ААН наведалі Украіну ў пачатку красавіка. Яны не знайшлі доказаў таго, што ракета была зробленая ў Расіі. А "інфармацыя аб траекторыі, пададзеная ўкраінскімі ўладамі, паказвае на тое, што яе запусцілі з тэрыторыі Расійскай Федэрацыі", — гаворыцца ў дакладзе. Напрошваецца выснова, што Расія закупляе паўночнакарэйскія ракеты і парушае эмбарга на пастаўкі зброі, уведзенае супраць Паўночнай Карэі ў 2006 годзе.
Агенцтва нагадвае, што на пасяджэнні Рады Бяспекі ААН у лютым ЗША ўжо абвінавачвалі Расію ў запуску пастаўленых КНДР балістычных ракет. Паводле звестак амерыканскага боку, такія ракеты запускаліся супраць Украіны як мінімум дзевяць разоў.
І Масква, і Пхеньян усе абвінавачванні дагэтуль адпрэчвалі. Але летась бакі абмяркоўвалі і ваенныя адносіны.
