Мастоўскі завод, нягледзячы на загад “зверху”, не вяртае грошы рабочым

Як ужо паведамляла Еўрарадыё, Гродзенскае абласное ўпраўленне Дэпартамента дзяржінспекцыі працы і пракуратура Мастоўскага раёна абавязалі завод “Мастоўдрэў” выплаціць заробак працоўным за перыяд з 10 лістапада па 24 снежня мінулага года і налічыць аплату за час прастою з 25 снежня па 11 студзеня гэтага года. Зрабіць гэта завод павінен быў да 17 сакавіка. Аднак да гэтага часу заробак выплачаны толькі часткова, а аплата за час прастою не налічана практычна поўнасцю.

Пры гэтым прафсаюз мастоўскага завода замест працоўных у гэтай сітуацыі абараняе кіраўніцтва прадпрыемства.

У сувязі з гэтым дэпутат Мастоўскага раённага савета Зміцер Кухлей накіраваў запыт на імя старшыні прафсаюзнай суполкі заводу “Мастоўдрэў” Валерыя Палішэвіча, у якім папрасіў патлумачыць афіцыйную пазіцыю прафсаюза па пытанні вяртання нявыплачаных работнікам прадпрыемства сродкаў.

З адказу кіраўніка прафсаюза вынікае, што выплат інжынерна-тэхнічным работнікам не будзе, таму што яны былі "азнаёмленыя з загадам аб скарачэнні выплат за месяц да ўступлення загаду ў сілу". На самой жа справе супрацоўнікі завода даведаліся пра загад ужо пасля ўступлення яго ў сілу.